أول موضوع في المدونة .. ما اعرف ليه متوترة وحاسه قلبي يدق يدق :)
فكرة اني أعمل مدونة خطرت على بالي أمس في لحظة تجلي :) .. و على عكس العادة ما اخذ الموضوع مني تفكير كثير . أمس قررت واليوم نفذت و هاهي مدونتي الجميلة .. طبعا من العجله لسه ما استقريت على الديزاين النهائي و حتصير تغييرات وتجارب لحد ما استقر على التمبليت اللي يعجبني ..
حابة ابدأ اول موضوع في أول يوم من السنة الجديدة بالكلام عن القرارات والأهداف اللي ناوية احققها في 2013 . طبعا كان لبوست قورجس " تحدي قورجس 30 يوم من الجمال " دور كبير في انه شجعني احاول أعمل شي مشابه في شهر يناير .. وراح احاول استمر بقية شهور السنة و يمكن كل شهر اغيّر أو اضيف تحدي جديد ..
الأهداف اللي أنا حاطتها لـ 2013 أغلبها متعلق بالصحة النفسية لأني اؤمن تماما بأنها الأهم . راح احاول اطبق وسائل و تمارين و حميات لها جانب ايجابي كبير على مكافحة الاكتئاب وتقلبات المزاج و جلب السعادة . ما راح اكتب ايش هي الاهداف الآن لأني ناوية افرد لكل وحدة بوست مستقل اتكلم فيه بالتفصيل.
راح احاول كمان تكون المدونة زي اليوميات اللي اقيس فيها اي تقدم احققه بسبب هذه الوسائل . ولو لا سمح الله حصلت انتكاسات كمان راح اسجلها عشان أكون بعيده عن المثالية اللي مالها داعي .
و ... بس ! نخلي بقية الكلام للبوستات الجاية :)
اتمنى لمن يقرأ المتعة والفائدة . واتمنى للجميع سنة جديدة سعيدة كلها خير وفرح و سعادة ♥
ليست هناك تعليقات:
إرسال تعليق