بوستين في يوم واحد !! ... هذا اللي يسموه حماس المبتدئين هههههههههه
أهم هدف حطيته لنفسي في 2013 هو اني امارس التأمل كل يوم لمرة واحدة على الأقل .
من زمان وأنا نفسي جدا اتعلم التأمل لكن كنت اشوفه شي صعب و معقد وماكنت متأكده من فوايده . لحد ما شفت الاسبوع الماضي حلقة من برنامج دكتور أوز و كان ضيف الحلقة مغني مشهور يعاني من الاكتئاب الحاد من صغره :( .. قال جمله لفتت انتباهي .. قال ان اللحظات الوحيدة اللي ما يحس فيها بإكتئاب هي اللحظات اللي يمارس فيها التأمل ..
بعد الحلقة تشجعت ابحث عن التأمل وقرأت كتاب عنه و قرأت كمان كثير في المواقع عن طريقته وفوايده . تفاجأت لما اكتشفت ان طريقته سهلة جدا و مافيها أي تعقيد . و تفاجأت كمان من فوايده الكثيرة وان حتى الأطباء ينصحوا فيه ..
طيب تعالوا نسأل .. ايش هو التأمل ؟
لوعملتوا بحث عن التأمل في الانترنت راح تلقوا تعاريف كثيرة من النوع التي ما تدري وش تبي ! النوع اللي يقولك ان التأمل هو انبثاق حيز اللاوعي للطاقة الكامنة في الانسان ! .. بالله هذا كلام ؟؟
عشان كذا خذوا العلم مني :) .. التأمل هو ببساطة انك تركزي تفكيرك على نقطة وحدة و تحاولي تفرغي ذهنك من كل الافكار الثانية .
طيب ايش فوائده ؟ فوايد التأمل انه يساعد في خفض ضغط الدم وتهدئة نبضات القلب السريعة وتحسين الدورة الدموية و يخفف من الشعور بالألم .
أما الفوايد النفسية فهي الاسترخاء ، زيادة التركيز ، صفاء الذهن ، التقليل من القلق والتوتر ، التوازن النفسي ، زيادة الشعور بالرضا ، تحسن المزاج ، و البعض يقول ان التأمل يطور من الحدس يعني يخلي الحاسة السادسة شغالة على طول :)
بالنسبة لطريقته أنا بس راح اتكلم عن طريقة التأمل للمبتدئين ... و على فكرة التأمل له أكثر من طريقة وأهم شي الواحد يختار الطريقة اللي يكون مرتاح لها لأنه لو توتر أثناء التأمل ما راح يستفيد شي ..
الطريقة كالتالي :
1- اختيار مكان هادي بعيد عن الازعاج ( مثلا غرفة في البيت بعيدة عن الضوضاء )
2- الجلوس بظهر مستقيم - وهي الجلسة اللي يسموها وضعية اللوتس .. لكن مو شرط .. ممكن تتمددي على الارض او الكنبة .. أهم شي لو تبغي تجلسي يكون الظهر مستقيم .
3- الاسترخاء .. حاولي انه ما يزعجك شي او يوجعك شي .. لو الجلسة ازعجتك اسندي ظهرك على مخدات أو تمددي .. لو لسه متعشية انتظري ساعتين بعد الأكل .. البسي ملابس مريحة ... حطي اضاءة خافته أو ولعي شمعه أو موسيقى خافته .
4- غمضي عينك و حاولي ان عضلات وجهك تكون مسترخية .. ولا تكشري :)
5- وهنا نجي لأهم أهم نقطة .. محاولة التركيز على شي واحد . كبداية من الأفضل يكون التركيز على التنفس .. يعني وانتي مغمضة عينك ركزي على تنفسك .. تنفسي طبيعي من انفك . وحاولي تتخيلي الهوا وهو يتحرك في جسمك .. فضي مخك من اي افكار ثانية .. طبعا هذه الخطوة صعبة جدا لأن الواحد في راسه الف فكرة و فكرة في نفس الوقت .. و في البداية بالذات راح يكون شبه مستحيل .. لكن مو مشكلة .. لو سرحتي في اشياء ثانية حاولي بهدوء و بلطف ترجعي تركيزك على التنفس .. لا تكوني قاسية على نفسك و لا تتوتري .
6- لما تخلصي افتحي عينك بهدوء وخذي نفس عميق و اوقفي بهدوووء ..
و بس ! هذا هو التأمل :) .. شفتوا ما اسهله !
نصائح مهمة :
- كبداية جربي تمارسي التأمل مرتين في اليوم كل مرة لمدة خمس دقايق .. اذا صار التركيز اسهل عليكي زوديها لربع ساعة و هكذا حتى توصلي ساعة كاملة
- أفضل وقت للتأمل يكون الصباح وبالذات الفجر لأنه يكون اهدى وقت .
- لا تمارسي التأمل عشان فوايده بس و يخيب أملك لو ماشفتي نتيجه .. ادري انها صعبة شوي يمكن تقولوا اجل نتأمل عالفاضي :) .. الخبراء يقولو لكم خلي التأمل هو هدف بحد ذاته .. هذا الكلام له علاقة بفلسفة الـ Zen و الفلسفات القديمة الاخرى
- البعض ينصح بترديد عبارة معينة تكون هي نقطة التركيز (بدل التنفس ) .. ممكن تكون عبارة ايجابية ( أنا أفضل .. أنا اقوى ) و ممكن تكون عبارة دينية (سبحان الله .. لا إله إلا الله ) .. فايدة نقطة التركيز انه كل ما سرحتي بأفكارك ترجعي للتركيز على هذه النقطة وتصفي ذهنك من الافكار الثانية .
- اقرأي و ابحثي في الانترنت عن التأمل يمكن تكتشفي طرق ثانية تناسبك أكثر . التأمل موضوع طويل ومتشعب وفيه ناس بتمارسه طول حياتها .. حتلقي في المواقع الاجنبية كلام كثير عن البوذية فلا تخافي :) ..اتركي كل الكلام هذا لأن التأمل مو حكر على ديانة معينة أو جماعة معينة .
اليوم الصباح لأول مرة جربت التأمل لمدة 5 دقايق . انبسطت لأني قدرت اركز على تنفسي لمدة ثانية كامله :) .. والخمس دقايق عدت بسرعة شديدة ... راح احاول اجربه كمان اليوم المسا قبل النوم .. لحد الآن اشوفه اسهل بكثير مما توقعت والتركيز على التنفس مو صعب كثير .
ذاتس أوول ... اتمنى يكون الموضوع مفيد و اتمنى لكم تأمل يجيبلكم السعادة والرضا .
