خلطة لتوحيد لون الجسم

عنوان التدوينة كأنه موضوع في منتدى عالم حواء ! هو بصراحة انا اخذت هذه الخلطة من عالم حواء زمن الطيبين . و كانت الخلطة الطبيعية الوحيدة اللي شفت لها نتايج ممتازة واستمرت نتايجها حتى بعد ماتركتها . اتذكر اول ما جربتها كنت مبسوطة بيها و قلت لوحدة من صحباتي عنها واستخدمتها لمفاصل قدمها و قالت لي ان المفاصل فتحت كثير وحتى زوجها لاحظ . عارفة اني قلبتها عالم حواء رسمي بعد آخر جملة ههههههه بس عنجد والله كل ماسبق قصة حقيقية و بما اني رجعت استخدم الخلطة قلت اكتب عنها يمكن تفيد شخص او شخصة ثانيين :

الخلطة ببساطة هي :

نص فنجان عصير ليمون
نص فنجان زيت جلسرين ( انا استخدم هذا النوع . رخيص  و حجمه كبير )
ربع فنجان زيت لوز
ربع فنجان زيت خروع (استخدم هذا النوع )

اخلطيهم مع بعض واستخدميهم على الجسم . انا اخليهم ساعة واستحم وبعدين ارطب جسمي بالمرطب الحبيب من آيهرب هذا افضل مرطب للجسم استخدمته ♥♥ .

جربت الخلطة يوميا لمدة شهر وشفت النتايج . ما ابغى ابالغ واقول نتايج مبهرة بس والله بالنسبة لي كانت جدا جدا جدا مرضية . وحدت لون جسمي وبالذات من ناحية اعلى الذراع و بطة الرجل . الخلطة ترطب جسمك مضبوط والسواد غالبا يكون بسبب الجفاف . مو ضروري تتقيدي بالأنواع اللي ذكرتها اي جلسرين اوزيت من العطار بس يكون كويس يفي بالغرض . وكمان مو لازم نفس الكمية بس راعي التناسب بينها ( الزيوت نصف كمية الليمون والجلسرين )

اتمنى تعجبكم اذا جربتوها ♥♥♥

كيف نتغلب على الأفكار السلبية

مسا الخير ❀

موضوعي اليوم عن طريقة فعالة للتغلب على الأفكار السلبية .. الطريقة هذه لقيتها في كتاب اشتريته من جرير ورغم اني قرأت نصه فقط إلا انه كان من اكثر كتب تطوير الذات اللي استفدت منها ❤

أول شي خلوني ابدأ بتوضيح ان كل البشر تجيهم افكار سلبية عن نفسهم .. كلهم .. كلهم .. هذا التوضيح مهم ومفيد جدا عشان الواحد مايحس انه لوحده وان في شي غلط فيه . كل الناس تجيهم افكار تهز ثقتهم بنفسهم و عندهم وساوس ومخاوف .. طريقة تعامل الناس مع هذه الافكار هي اللي تختلف .. في اللي يطنشها ويركنها على جنب .. وفي اللي يستسلم لها لحد ما يصير ضحيتها .. وفي اللي يحاول يتغلب عليها ..

عشان نكون من النوع الأخير .. في عدة طرق وتكنيكز .. هذه وحدة منها واسمها "Capability Affirming Thoughts" أو " أفكار تأكيد القدرة " ,, الغرض منها ان تحل محل الافكار السلبية عندنا .

الطريقة ببساطة : راقبي الطريقة اللي تكلمي فيها نفسك .. الصوت اللي بداخلك اللي غالبا يقولك انك ما تقدري ، ما تنفعي ، ما تعرفي . اكتبي كل فكرة سلبية قالها لك هذا الصوت . على مدار عدة أيام لا تعملي اي شي غير انك تكتبي هذه الافكار السلبية في ورقة .. راح تلاحظي ان هذه الافكار السلبية غالبا متكررة . يعني مثلا حاولتي تعملي اشياء مختلفة او كنتي في مناسبات اجتماعية مع ناس تقابليهم أول مرة .. يمكن الصوت هذا قالك في كل مرة: شخصيتك مو حلوة والناس ما يحبونك .. أو كنتي في اجتماعات عمل او دراسة و كنت ساكتة اغلب الوقت .. الصوت يقولك دايما : انتي خجولة و وجودك زي عدمك .. .. وقبل ما اكمل ، احب بس اوضح ان هذه مو حقيقتك . والصوت هذا حتى لو كان ملازمك طول حياتك وحتى لو كان ناس حواليكي يرددوا نفس الكلام .. هذه مو حقيقتك .. هذه مجرد افكارك وافكار اللي حواليكي . هذا شي مهم لازم ما تنسيه ابدا ✧

الآن كتبتي العبارات كلها في ورقة .. اكتبي امام كل وحدة منها عبارة ايجابية .. مثلا : لو كانت العبارة السلبية " عمري ماراح افلح في شي " .. اكتبي مثلا " أنا كل مرة احاول فيها اتحسن اكثر واكثر و قريبا راح اتعلم " .. لو العبارة " انا دايما اخذ قرارات متسرعة وغبية " تكون العبارة الايجابية " كل قرار اخذته حتى لو غير صحيح تعلمت منه والمرة الجاية راح تكون افضل " ..

وهكذا . خلي الورقة عندك واقرأي الأفكار الايجابية دايما ( الايجابية فقط ) .. الغرض من هذه الطريقة انك تعودي عقلك في كل مرة تجيكي فكرة من الافكار السلبية ان العقل على طول يجيب معاها الفكرة لايجابية ,, الطريقة هذه راح تحسسك بثقة اكبر وارتياح اكبر في ساعتها ... خلينا نقول ان حصل لك موقف محرج و انتي من النوع اللي يقسى على نفسه .. لما الصوت اللئيم اياه يبدأ يقولك كلام سلبي ، راح تلقي نفسك على طول افتكرتي العبارة الايجابية الي كتبتيها ... 

حاولي تكون العبارات الايجابية واقعية .. عشان عقلك يستوعبها ومايعملها block .. يعني لا تكتبي اشياء من نوع " أنا اروع وحدة في الدنيا و الناس تجري ورايا " .. لا .. خليها واقعية و لها علاقة بالفكرة السلبية وكأنها نقيضها أو عكسها ...

هذه الطريقة عنجد غيرت اشياء كثيرة فيني واتمنى من كل قلبي تفيدكم ♥♥♥ 

عودة بعد غياب طويل ..

مرت سنتين تقريبا من آخر مرة كتبت هنا . ما توقعت اتوقف عن الكتابة كل هذا الوقت . وما اتوقعت كمان اني ارجع اكتب . فكرت ان سنتين فترة طويلة جدا وليش ارجع واكتب و فكرت كمان اني كالعادة ابدأ في شي وما انتهي منه وهذه المدونة مو استثناء :(  لكن كلمة لطيفة وصلتني خلتني اغير رأيي وارجع .

في السنتين هذه مريت بأشياء كثيرة جدا بعضها صعب جدا جدا وبعضها جميل جدا . واكتشفت ان كل انسان مننا فيه قوة هائلة يقدر يتخطى اصعب الظروف بس لو اشتغل على حاله شوي .

زي ما قلت كلمة لطيفة خلتني اغير قراري و ارجع للمدونة ( للفترة الحالية عالأقل :)  ) .. و هذا اللي ابغى اتكلم عنه اليوم . تأثير الكلمات في حياتنا . علينا وعلى الناس الثانية . وان كنا ما نقدر دايما نتحكم بالكلام اللي نسمعه  . فاللي بيدنا اننا نتحكم بالكلام اللي نقوله احنا للآخرين .

ماعندكم فكرة قد ايش ممكن تأثر كلمة طيبة نقولها في نفسية شخص ما ، ممكن تفرحه أيام بسببها . ممكن تخفف عنه نكد و اكتئاب الله العالم فيه . احنا مجتمع نحب الانتقاد جدا و اذا شي ما عجبنا على طول نتكلم و نسمع اللي حولنا . لكن اذا شي عجبنا نسكت !  .. ياما حصلت انه نشوف صديقة او قريبة محلوة وشكلها لطيف و ما نقول شي ، لكن لو هذه الصديقة زاد وزنها او كانت ذبلانة وشكلها تعبان على طوووول ( سلمات يا فلانه ايش بك اليوم شكلك كذا ؟ )  ..

اتذكر مرة اوبرا وينفري في برنامجها استضافت كاتبة قالت ان الكلمات لما تطلع من صاحبها تبقى في المكان ما تختفي ، قالت تخيلوها لاصقة في الأثاث وفي الجدار كذا الكلمات ما تروح وتفضل في بال اللي سمعها ما ينساها . تخيلوا لو كانت كلمات طيبة وتشجيع كيف راح تأثر في اللي سمعها وكأنه كلما شافها لاصقة في الجدار تذكرها :)

ناس كثير حوالينا تعاني بصمت . الاكتئاب جدا انتشر و السلبية و الاحباط . ماراح يكلفنا شي لو قلنا كلمة ايجابية ممكن تخفف عن الناس او حتى تنقذهم من اليأس اللي عايشين فيه . عشان تكون كلماتنا مؤثرة مو معناه تكون مجاملة و بعيدة عن الحقيقة و تسليك وكذا . بالعكس ، ممكن نحاول تركز على الشي الايجابي اللي يملكه كل واحد فينا . جربت في الفترة الماضية اني كل يوم اقول كلام ايجابي لأشخاص و مو ضروري اكون اعرفهم شخصيا . ارسلت اول يوم رسالة شكر لموظفة خدمة عملاء في موقع اشتري منه و شكرتها على الخدمة الرائعة . ثاني يوم كتبت تغريدة لشخص ينشر وظائف في تويتر ونصائح للتوظيف و قلته ان اللي يسويه شي جدا مهم و مفيد للكثيرين . ثالث يوم قلت لزميلة عمل عندها مشاكل ثقة بالنفس ان تعاملها مع الناس حلو و الكل يحبها و وضحت لها صفاتها الحلوة ( هذه الاخيرة بالذات كنت دايما اقولها انها عبيطة و حقها دايما ضايع بسبب خيبتها !! كانت تضحك لكن اكيد كان كلامي يأثر فيها سلبيا )
.. ماعندكم فكرة قد ايش ردات الفعل كانت محمسة ! .. حتى الناس اللي ما قلت لهم الكلام وجها لوجه وصلتني فرحتهم بكلامي من ردودهم بأني اسعدت يومهم ❤❤  . شايفين كيف ممكن تسعد ناس بعيدة عنك من دون جهد و بأنك تقول الحقيقة لا تكذب ولا تجامل .

حاولوا تجربوها ، اختاروا ثلاث اشخاص لو من الانستجرام واتركوا لهم تعليقات مشجعة ولطيفة و شوفوا كيف انتوا ما حتسعدوا يومهم بس حتسعدوا يومكم كمان :)


نشوفكم في تدوينة قادمة انشالله ✌