تجربتي مع منتجات اشتريتها من موقع iHerb

صباح النور والورد . أحب صباحات الويك اند كلها سكون وتخليني احس بالتفاؤل . أحب اكتب في الصباح ما افتكر اني كتبت اي موضوع في المدونة في الليل :$

موضوعي اليوم حيكون ريفيو بسيط وسريع لمنتجات اشتريتها من موقع iHerb و رأيي فيها بعد التجربة . اتكلمت عن الموقع هذا قبل كده في تدوينة سابقه وقلت ان أغلب المنتجات اللي فيه اورغانك للي يحب هذا اللايف ستايل . المنتجات اللي في الموقع كثيرة جدا وأغلبها غير معروف عندنا عشان كدا قررت أكتب هذا الموضوع يمكن يساعد اي شخص يحب يجرب الشراء منه . راح اقسم الموضوع على عدة اجزاء وكل فترة انزل جزء لأن المنتجات اللي جربتها كثيرة وقابلة للزيادة بما إني صرت مدمنة تسوق من هذا الموقع :(

أولا - منتجات عجبتني جدا و راح أكرر شراءها :

 ** شامبو  شجرة الشاي 

اسم المنتج : Nature's Gate, Tea Tree Shampoo

السعر : 6.53 دولار

شجرة الشاي مادة مطهرة و عشان كدا هذا الشامبو مناسب جدا لفروة الراس المتهيجة اواللي فيها حبوب . الشامبو كمان خالي من كثير من المواد الضارة اللي تكون عادة في أغلب الشامبوهات التجارية مثل مادة الباربين أو لوريث الصوديوم . عجبني الشامبو جدا . مناسب للاستخدام اليومي و ما يجفف الشعر .. وريحة شجرة الشاي تحسسني بالانتعاش . أكيد راح ارجع اشتريه لو خلص أو ممكن اجرب شامبو ثاني من نفس الشركة Nature's Gate لأني سمعت مدح كثير على أغلب منتجاتهم .

** الصابونة الافريقية السوداء

اسم المنتج : Nubian Heritage African Black Soap

السعر : 3.27 دولار

صابونة مصنوعة من مكونات نباتية 100% .. لسان الحمل والتمر الهندي وزبدة الشيا ، وهي من أفضل المنتجات مبيعا في الموقع وتقييمها عالي جدا . أنا حبيتها لأنها أبدا ما تجفف الجسم . واستخدمتها مرة على وجهي و ما عملت لي اي مشاكل ( أنا أبدا ما استخدم صابون لوجهي لأن بشرتي حساسة ) . ما اعرف اذا توحد اللون أو تبيض أو ما اعرف ايه لأني بصراحة ما استخدمتها لهذا الغرض . أنا كنت ابحث عن صابونة من مكونات طبيعية و ما تجفف البشرة و لقيت اللي ابغاه فيها . طبعا راح ارجع اشتريها ثاني لأنها ناسبتني جدا .

** لوشن للجسم

اسم المنتج : Beauty Without Cruelty, Fragrance Free Lotion

السعر : 8.02 دولار

خلوني ابدأ بأني اقول اني أحبببب هذا اللوشن ♥♥♥ .. من أفضل الاشياء اللي اشتريتها من الموقع . خفيف و ماله ريحة والبشرة تتشربه بسرعة . أحب منتجات شركة Beauty Without Cruelty لأنها خالية من مادة الباربين المضرة وخالية من المكونات الحيوانية . اللوشن هذا خالي من العطور لكن ممكن اضافة القليل من الزيوت العطرية له واستخدامه في المساج مثلا أو الاروماثيرابي . أنا خلاص ما استخدم مرطب غيره يعني أكيد راح اشتريه ثاني وثالت ورابع :)

ثانيا - منتجات ماراح أكرر شراءها :

* زيت الجوجوبا

 اسم المنتج : Now Food Solutions, Jojoba Oil

السعر : 11.46 دولار

زيت الجوجوبا مثل أي زيت لازم يكون اورغانك عشان يكون مفيد . كنت ادور على نوع اصلي واللي عند العطارين سعره مبالغ فيه . قلت أجرب هذا النوع لأن الشركة معروفة ومكتوب عالمنتج انه اورغانك . ولما وصلني جربته لفترة ولاحظت عدة اشياء ما عجبتني . اولا الزيت له ريحة غريبة كأنها ريحة شي محروق . ثانيا طلع لي حبوب لما استخدمته على جسمي (زيت الجوجوبا المفروض ما يطلع حبوب لأنه تكنيكالي مو زيت ) .. قرأت في موقع ثاني ان زيت الجوجبا مهم جدا يكون معصور عالبارد عشان يكون محتفظ بالعناصر المفيدة اللي فيه و ما اعتقد ان هذا النوع كذا . بالمختصر ما ناسبني و ماراح ارجع اشتريه مرة ثانية .

* زيت اللوز الحلو

اسم المنتج : Now Food Solution, Sweet Almond Oil

السعر : 3.18 دولار

ما حسيت انه يفرق عن اي زيت لوز حلو اشتريته من العطار :$ . بشكل عام قررت الزيوت اللي ممكن اشتريها من هنا بسعر كويس ما يحتاج اشتريها من الموقع ..

 * فيتامين د :

اسم المنتج : Healthy Origins, Vitamin D3
السعر : حوالي 6 دولار

نفس الشي حسيت ما يحتاج اشتري فيتامينات د طالما هي متوفرة في الصيدليات هنا بسعر وجودة متقاربة .



* شوكليت كوكيز

اسم المنتج : Go Raw, Organic Super Cookies

السعر : 4.32 دولار

رقائق كوكيز بالشوكلاته ، جوز الهند و بذور السمسم .. المفروض انها صحية وكوشر ومافيها جلوتين وكل حاجه كويسه لكن طعمها ما عجبني ابداااا :(  .. ناشفه جدا وماتنبلع .. ما افكر ابدا اشتريها او حاجه زيها بعد كدا :(

أتمنى هذه الميني ريفيوز تعجب وتفيد كل شخص حاب يعرف أكثر عن منتجات الموقع و حاب يجرب يشتري منه . 

واللي حابه تحصل على خصم 10 دولار من اول طلبية تستخدم هذا الكود KMC488 في التشيك أوت . أو هذا اللينك

http://www.iherb.com/?rcode=kmc488

اذا اشتريتوا من الموقع راح تحصلوا كمان على كود خاص بكم و تستفيدوا كل مرة يستخدمه شخص تاني .

اتمنى للجميع ويك اند سعيد مريح و منعنش ♥ ♥

فوائد شرب الماء الدافئ مع الليمون .. للكبد ولأشياء أخرى !

زي ما وعدت رجعت لكم بطريقة سهلة و مفيدة لتنظيف الكبد . الكبد زي ما قلت في البوست السابق من أهم اعضاء الجسم و هو مسؤول عن كثير من المشاكل اللي تؤثر على المظهر الخارجي زي الحبوب ، التصبغات ، الهالات السوداء ، وحتى ريحة الجسم ! كل هذه المشاكل ممكن تنحل بدون كريمات و بمجرد الاهتمام بصحة الكبد وتخليصه من السموم .

الطريقة هي شرب كاس من الماء الدافئ معصور فيه ليمون كل صباح وعلى الريق .

في البداية حاولي يكون الليمون مجرد قطرات عشان ما تتعب معدتك أو يصيبك حرقان . و ممكن في البداية كمان تضيفي ملعقه صغيره عسل . بعدين حاولي تزيد كمية عصير الليمون لكن ما تزيد في كل الأحوال عن شريحة ليمونه كبيرة أو ربع ليمون بن زهير . الماء يكون دافي أقرب إلى الساخن .  ولا تاكلي شي بعده الا بعد 20 دقيقة . واحرصي على تفريش الاسنان بعدها عشان ما تتأثر بحموضة الليمون .

هذه الطريقة مو مفيدة بس لتنظيف الكبد من السموم  لكنها مفيدة جدا كمان لأشياء ثانية :

- تقوية جهاز المناعة .

- تحسين عملية الهضم .

- تساعد على تقليل الوزن .

- الليمون مدر للبول ، فيساعد على التخلص من السموم 

- تساعد على توازن قلوية الجسم Alkalinity . وهذا يعني بإختصار ان الجسم يقدر يشفى من أي مرض لو كان في حالة قلوية و ليس حمضية . لكن أغلب الأكل اللي بناكله بيخلي الجسم حمضي . لكن في بعض الأشياء تساعد الجسم يرجع للحالة القلوية زي الليمون مع الماء ( حأكتب موضوع عن الـ PH balance للجسم لأنه موضوع مهم ومو مرة معروف عندنا ) الليمون مع انه حامض إلا انه داخل الجسم يصير قلوي أو قاعدي .

- يساعد على صفاء البشرة : طبعا بما إنه يطرد السموم أكيد حيساعد البشرة على التخلص من الشوائب . ميزة أخرى لليمون لاحتوائه على فيتامين سي انه يقلل من التجاعيد .

- الليمون غني بالبوتاسيوم . والبوتاسيوم معدن مهم جدا في تسهيل الانتقالات العصبية في الدماغ والجهاز العصبي .  الاكتئاب ، القلق والتوتر و النسيان  كلها أعراض على نقص البوتاسيوم في الدم !

تجربتي : صار لي اشرب الماء الدافئ والليمون كل صباح حوالي الشهر . هو مدر للبول فعلا لكن مو بشكل مزعج . ما لاحظت انه يخفف الوزن . لكن أكبر تأثير لاحظته هو على بشرتي . تحسنت كثير والحمدلله . الحبوب خفت كثير و الآثار كمان خفت . التصبغات لسه ما تأثرت كثير لكن بشرتي بشكل عام صار لها glow جميل . بصراحة مرة ارتحت عالطريقة و ما اعرف ليه ما جربتها من زمان .. انشا الله راح استمر عليها واخليها جزء اساسي من روتيني الصباحي .

أتمنى يكون بوست اليوم عجبكم وتجدوا فيه الفايدة ♥ . يا ريت تجربوا الطريقة و اذا عندكم اي سؤال اتركوا تعليق هنا أو سؤال في الأسك أو تويتر .

 

الطريق إلى الجمال والسعادة ... يبدأ من الكبد

كنت دايما اسمع ان العناية  بالجمال تبدأ من الداخل .. بس بصراحة ماكنت اقدر استوعب . اقرأ في المنتديات والمجلات واسمع في البرامج ان الحصول على بشرة خالية من العيوب وشعر جميل  يعتمد على التغذية السليمة ، واهز راسي موافقه وانا اقرأ هالكلام ، لكن بعد دقيقة على طول اروح احط على وجهي الكريم اللي اشتريته بأكثر من 300 ريال على أمل ان مشاكل بشرتي تنحل بسببه ..

بس لو يرجع في الزمن لورا :(  . كنت وفرت على نفسي وقت وجهد طويييل .  

العناية بالجمال من الداخل معناها تنشيط اعضاء الجسم عشان تعمل بكفاءة وتخلصنا من المشكلة اللي نعاني منها بدون الحاجة إلى كريمات و أدوية . مثلا : العناية بالبشرة اللي تعاني من حبوب أو تصبغات أو حتى آثار . الجسم البشري قادر على معالجة كل هذه المشاكل بنفسه بدون أي تدخل خارجي ، لكن اسلوب حياة اغلب الناس يمنعه : الأكل المصنع  والجنك فوود - التلوث - عدم ممارسة الرياضة - التوتر ، كل هذه الأمور تؤثر على أعضاء الجسم و ترهقها و ما تخليها تمارس عملها بشكل صحيح .

ومن أهم هذه الأعضاء هو الكبد .

الكبد هو فلتر لجسم الإنسان لأنه يساعده في تخزين الفيتامينات وحرق الدهون ويخلصه من السموم وينقي الدم . الكبد في اليوم الواحد ينقي حوالي 95 لتر من الدم وهو حجم كبير يحتاج كبد سليمة ونشطه .  تخيلوا الكبد في جسم انسان اللايف ستايل تبعه مو صحي أبدا مثل أغلبنا للأسف ،  مثلا الأكل الغير صحي مليان مواد ضارة وسموم راح تزيد  من الجهد اللي يبذله الكبد عشان يتخلص من كل هذه المواد . والنتيجة تكون كبد مرهقة مو قادرة من كثرة المجهود تتخلص من كل السموم فبعضها يترسب على خلايا الكبد نفسها . سموم مترسبة نتيجتها حتكون تصبغات في الجسم ، حبوب ، طفح جلدي ، انتفاخ في بعض اجزاء الوجه ، سواد تحت العين ، مشاكل في الهضم . وكمان عدم التركيز و تقلبات المزاج والاكتئاب . يعني في النهاية الثلاثة فعلا مرتبطة ببعض : المظهر الخارجي و الجسم من الداخل و الحالة النفسية ! وما ينفع نهتم بوحده ونهمل البقية .

الرائع في الكبد انها سبحان الله رغم كل الضرر هذا ممكن تجدد نفسها وترجع سليمة ونشيطة اذا الانسان ساعدها بالتالي :

- الامتناع عن تناول الأكل غير الصحي : أهم شي هو الامتناع عن الجنك فوود  والمشروبات الغازية وهذه مضرة جدا لأن السكر الصناعي فيها يمكن يصيب الكبد بالتليف على المدى البعيد .

- الاكثار من الخضروات : الجرجير و البروكلي والخيار و اللفت ( Kale ) و هذا الأخير بالذات مفيد جدا و كل الاجانب هابين فيه هذه الأيام.

- تناول االثوم و الكركم و الشاي الاخضر للمحافظة علىى سلامة الكبد .

- التقليل من تناول الملح و السكر ـ والسكر يا ريت الامتناع عن تناوله على طول لأن اضراره مو معقولة حتى على الحالة النفسية :(

- التخلص من السموم Detox : وهذه لها أكثر من طريقة :  في ناس تسويها لثلاثة أيام زي الدايت ما تاكل وتشرب الا اشياء معينة . وفي طريقه اسهل بكثير ممكن نسويها كل يوم مع أكلنا العادي و وحده من هذه الطرق راح اتكلم عنها البوست الجاي .

- فيتامين د : مرة ثانية حنرجع لفيتامين د هذا الفيتامين مو معقول قد ايش مهم لكل عضو في الجسم . زي ما قلت في البوست السابق انه يدخل في تكوين خلايا كل عضو . عشان كذا لو عندك نقص فيتامين د لازم تعالجيه لأنه راح يأثر على سلامة الكبد .

- الرياضة : لأن الرياضة تحسن من التنفس يعني اكسجين اكثر لكل عضو في الجسم بمافيها الكبد .. و كمان تنشط الدورة الدموية فتخلي تنقل الدم من القلب للكبد سهل و يخفف المجهود عليهم .

أتمنى يكون البوست مفيد و محمس للاهتمام بالصحة . البوست الجاي حيكون عن تجربتي مع احدى طرق الـ Detox السهلة و اللي لها فوايد كثيرة .

stay tuned  ♥

D for Depression .. نقص فيتامين د والاكتئاب .

فترة طويلة عدت من آخر مرة كتبت :( .. كنت جدا مشغولة مع ان عندي مواضيع كثيرة ابغى اتكلم عنها ..

من هذه المواضيع فيتامين د . طبعا لاحظنا كيف في الفترة الأخيرة زاد الاهتمام بهذا الفيتامين اللي للأسف أغلبنا في الخليج وفي السعودية بالذات يعاني من نقص حاد فيه لقلة تعرضنا للشمس . لكن الحمدلله بدأ وعي الناس يزيد وبدأ الأغلب يميز أعراضه و يروح يحلل ويتعالج خاصة ان العلاج فعال وسهل لكن يحتاج انتظام وصبر .

فيتامين د في الحقيقة هو هرمون وليس فتامين ، لأن الفيتامين شي تحصل عليه من الغذاء لكن فيتامين د يصنعه الجسم بنفسه اذا تعرض لموجات ضوئية محددة الطول مثل أشعة الشمس . عشان كذا قلة التعرض للشمس من أهم أسباب نقصه ، زي ماكنا نسمع أحيانا عن الناس اللي تعيش في بلاد تغيب عنها الشمس مثل شمال أوروبا والاسكا انه تزيد عندهم حالات الاكتئاب وبالذات فصل الشتاء .

طبعا هذا الفيتامين مهم جدا للحفاظ على صحة الانسان ... لتجديد الخلايا و امتصاص الكالسيوم و مقاومة الأمراض مثل ارتفاع ضغط الدم وامراض القلب والسرطان الله يبعد عنا وعنكم الشر . و لأنه يساعد في امتصاص الكالسيوم فله دور مهم جدا في مقاومة مرض هشاشة العظام اللي يصيب النساء غالبا .  أعراض نقصه هي : الخمول ، الأرق أو كثرة النوم بشكل مو طبيعي ، تخدير في الأطراف و آلام شديدة في الظهر ، ضعف مناعة الجسم  .. و الاكتئاب !

 فيتامين د له أثر كبير جدااا على الصحة النفسية وهذا اللي ابغى اركز عليه في موضوعي . كثير دراسات ربطت بين الاكتئاب و نقص الفيتامينات في الجسم . يمكن كثير مننا صعب عليه يربط بين الحالة النفسية و حالة جسمه من الداخل ، لكنها مرتبطة ارتباط وثيق ببعض .. لا تفتكروا ان الاكتئاب يجي بس من ظروف خارجية .. ياما ناس حياتهم مسهلة وميسرة وماعندهم مشاكل لكنهم يعانون من الاكتئاب والقلق والأرق . واحد من أهم هذه الأسباب هو نقص فيتامينات معينة في الجسم .. من أهمها فيتامين د و بي كومبلكس .وتأثير فيتامين د على الاكتئاب بسبب أنه  يدخل في تركيب خلايا أنسجه أغلب اعضاء الجسم بمافيها المخ ، و يؤثر على نفس الناقلات العصبية اللي تأثر عليها الأدوية المضادة للاكتئاب . يعني حتى لو كانت عندك ظروف خارجية تجيبلك الحزن والضيقه والاكتئاب نقص هذا الفيتامين يخليكي ما تقدري تخرجي من هذه الحالة . والحالة النفسية في النهاية هي تفاعلات في كيمياء المخ والغذاء اللي ندخله أجسامنا له تأثير كبير على هذه التفاعلات سلبا أو ايجابا .

نصيحتي لكل شخص يقرأ هذا الموضوع انه في أقرب وقت يقوم بالآتي :

- تحليل نسبة فيتامين د في الجسم من أي عيادة .. في السعودية عادة هذا التحليل يكلف 250 -300 ريال 

- الانتظام على تناول المكملات اللي يوصفها الدكتور في حالة وجود تقص  (النسبة الطبيعية من 30 إلى 100 نانو غرام / لتر)

- التعرض للشمس مرتين في الاسبوع لمدة لا تقل عن ربع ساعة . بدون وضع واقي للشمس .. لازم الشمس تلامس الجسم مباشرة بدون كريمات أو ملابس .. و مرتين كفاية لأن الجسم يخزن الفائض من فيتامين د ولا يتخلص منه .

معالجة نقص فيتامين د سهلة و يمكن من أسهل الطرق لمعالجة الاكتئاب والنفسية السيئة لكن تحتاج صبر فلا تهمليه أو تستخفي فيه،لأنه زي ما شفنا أعراضه نقصه كثيرة وشديدة بشكل يخلينا نستغرب انه سبحان الله نقص فيتامين واحد يعمل في الجسم والنفسية كل هذا .

تمنياتي للجميع بالصحة والعافية والسعادة الدائمة ♥♥

مشترياتي من موقع iHerb

هذا الموقع هو عشقي الجديد ♥ 

 iHerb هوموقع مختص بالمنتجات الطبيعية . فيه كل شي يحتاجه الشخص عشان يعيش لايف ستايل صحي ، من مكملات غذائية و اغذية عضوية إلى منتجات عناية بالجسم والشعر .. وحتى منظفات المنزل ! كلها من مواد عضوية . بصراحة الواحد يحتار في البداية ايش يشتري من كثرة المنتجات ... وأحلى شي انه يشحن للسعودية و بسعر ما حصلش !  24 دولار لأول كيلوين (حوالي 94 ريال ) وبعد كدا دولارين لكل باوند زيادة .. والشحن سريع جدا . تقريبا اسبوع و توصل الشحنة .

زي ما قلت هو عشقي الجديد .. وكمان إدماني الجديد  .. طلقت صيدليات البلد بالثلاثه من بعده :) .. صرت اشتري منه كل شي من زيوت لمزيلات عرق لمرطبات شفايف وحتى فرشاة الاسنان والمعجون ناوية اشتريهم منه .

وصلتني قبل كم يوم آخر طلبية منه . عبارة عن :

- زيت فيتامين E   ( سته دولار ) *

- حبوب اوميغا3    ( 17 دولار )

- مرطب للجسم     ( 8 دولار )

- غسول للجسم     ( 6 دولار)

- مزيل عرق       ( 3 دولار )

- كريم لليدين       (6.7 دولار )

- مرطبات شفايف (الواحد بدولار ونص تقريبا )

* الاسعار تقريبيه لأني ناسيتها ومو لاقيه الفاتورة :s

جربت الزيت واللوشن ومزيل العرق . الزيت خفيف جدا  و ريحته بالضبط زي زيت اللوز الحلو :s  .. اللوشن راااائع تمتصه البشرة بسرعه . مزيل العرق كويس لكن ما يطول كل ساعة ساعتين لازم ارجع احط منه :( .. 

نصائح قبل الشراء : 

- قبل شراء اي منتج شوفي تقييمه في الموقع و اقرأي تعليقات المشترين وبالذات التعليقات السلبية ، انا دايما ابدأ فيها :)

- لو كنتي في السعودية انتبهي من الجمارك . انا ما حصلت لي اي مشاكل معاهم وشحناتي بتعدي بدون مشاكل ، لكن سمعت ان الشحنات للشرقيه غالبا تتوقف و ماتعدي .
- لو تبغي تطلبي أغذية أو مكملات ، اختاري اللي تكون kosher عشان تضمني ان مافيها مشتقات الخنزير و ان الجيلاتين المستخدم نباتي و ليس حيواني .

- لو حابة تحصلي على خصم 10 دولار على أول طلبية . استخدمي هذا الكود KMC488 في التشيك أوت . أو استخدمي هذا اللينك

http://www.iherb.com/?rcode=kmc488

اذا اشتريتوا من الموقع راح تحصلوا كمان على كود خاص بكم و تستفيدوا كل مرة يستخدمه شخص تاني .

أتمنى يعجبكم الموقع زي ما عجبني ♥ ♥  . واذا عندكم اي سؤال اكتبوه في الكومنت أو اسألوا في الاسك  ♥

Dry Brushing

انتهى الشهر الأول من السنة وبدأنا في شهر جديد . صحيح اني ما التزمت بكل أهداف شهر يناير إلا ان الاشياء اللي عملتها لحد الآن كان لها تأثير رائع على بشرتي ونفسيتي والحمدلله  ♥

من هذه الاشياء طريقة سمعت عنها كثير وهي الـ dry brushing أو انك تستخدمي الفرشاة أو الليفة على جسمك عالناشف :) .. هذه الطريقة مفيدة جدا للجسم تساعده على التخلص من السموم و على تنشيط الدورة الدموية . وتساعد البشرة على التخلص من الخلايا الميته .

لها فوايد ثانية كمان :

- تساعد على تخفيف السيلولايت في الجسم .

- تشد الجسم.

- تساعد الجهاز اللمفاوي على التخلص من السموم وهذا يزيد من مناعة الجسم للأمراض .

- تقشر البشرة وتخليها ناااااعمة ومظهرها صحي 

- تساعد على التخلص من "جلد الوزة" أو Keratosis Pilaris و البعض يسميه جلد الدجاجة .. وهو احتباس الشعر تحت الجلد مع احمرار . (اضغطي هنا عشان تشوفي صورة له لو حابة ) استخدام الـ dry brushing مع كريم مقشر للجسم يحتوي على bha أو aha يساعد على التخلص من هذه المشكلة تماما .

- تحفز الغدد الدهنية في الجسم . وهذه نقطة مهمة جدا لأن هذه الغدد الموجودة في الجلد تساعد على التخلص من السموم . لكنها اذا ظلت خامدة بسبب ان مسام الجسم مثلا مسدودة بالخلايا الميته ما راح تؤدي وظيفتها . طيب هذه السموم فين تروح ؟ تروح للكبد والكلى لأنها مع البشرة من أهم اعضاء الجسم في التخلص من السموم . لكن الكبد والكلى مو دايما يقدرو يتخلصو من هذه السموم فتتراكم عليهم وهذا ضار بالجسم . الناس اللي لهم ريحة جسم موحلوة مهما استحموا و اللي بطة رجلهم او القدم عندهم مورمة غالبا يكون هذا هو السبب .

الطريقة سهلة جدا زي كل الاشياء اللي اتكلم عنها :)  .. مرري فرشاة الجسم على جسمك وهو جاف بحركات طولية سريعة او دائرية الى اتجاه القلب .. هذا فيديو يوضح الطريقة ( ابدأوا من الدقيقة 2 لأن الآدمية هرجها كثير D: )

 نقاط مهمة انتبهي لها :

- استخدام فرشاة مصنوعة من الياف طبيعية مو صناعية .

- لا تستخدم على الوجه ابدا , ولا تستخدم على اي مكان في الجسم فيه طفح جلدي

-افضل وقت لها الصباح عشان تعطي الجسم نشاط بعد خموله ساعات الليل . لكن أي وقت لها مناسب بس يفضل دايما قبل الاستحمام .

- يفضل تكون كل يوم ، أو على الأقل مرتين في الاسبوع .

صار لي تقريبا ثلاثة اسابيع اعملها ( الاسبوعين الاولى عملتها مرتين في الاسبوع بس ، الاسبوع الثالث كل يوم تقريبا ) و لاحظت ان بشرتي صارت انعم بكثير ومظهرها اجمل وبالذات يدي .

جربوها و راح تشوفوا نتايج حلوة جدا بإذن الله ♥

 

بخاخ الشاي الأخضر للبشرة

كان من أهدافي للسنة الجديدة اني اشرب شاي اخضر كل يوم عشان اعالج مشاكل بشرتي من الداخل وبالذات مشاكل الحبوب والتصبغات . وأقول "كان" لأني بصراحة ما قدرت :( .. ما اتحمل اشرب شاي اخضر طعمه فظيع ابدا ما يعجبني  لكنه جدا مفيد للبشرة و للصحة بشكل عام . و فكرت في طريقة بديلة بأني اسوي منه بخاخ استخدمه على بشرتي .

                                   ( الصورة من الانترنت )

الطريقة من ابسط ما يكون : كيس شاي اخضر اصب عليه ماء ساخن و اخليه نص ساعة وبعدين احطه في علبه سبري فاضية و احفظه في الثلاجة . استخدمه قد ما ابغي واخليه يجف على وجهي . الافضل انه ما نخليه اكثر من 7 أيام . يعني نسوي واحد جديد كل اسبوع.

ممكن تستخدميه قبل ما تحطي واقي الشمس لأن الشاي الاخضر فيه مواد تحمي البشرة من اشعة الشمس الضارة . و ممكن تحطيه في قوالب الثلج و تجمديه و تستخدميه كـ تونر . أنا استخدمه لما اطلع في الشمس و البحر أو لما اكون مريضه و حرارتي مرتفعه و مالي خلق استخدم اي كريمات لوجهي :(  .. ابخ منه كل كم ساعة و احس بإنتعاش فظييييع ..


بصراحة من أجمل الاشياء الطبيعية اللي استخدمتها  وناوية استمر عليه على طول .. يعطي نضارة حلوة للبشرة غير انه مع الاستمرار كويس للتجاعيد و يفتح البشرة . كمان مفيد كعلاج للروزيشيا والصدفية .


اتمنى تجربوه وتشوفوا فيه الفايدة  ♥♥♥

تجربتي مع كريمات العين من فيشي و لوي ويدمر

اليوم راح اكتب لكم عن تجربتي مع اثنين من اشهر كريمات العين : كريم فيشي  و كريم لوي ويدمر ..

انا كنت اعاني من هالات سوداء متوسطة ، و عندي خطوط رفيعه اسفل عيني .. و عند زاوية عيني الهالات شوية غايرة على جوا :(

لما قررت اشتري كريمات تعالج هذه المشاكل كان المدح مو طبيعي على هذه الكريمين في المنتديات العربية .. فتوكلت على الله واشتريتهم .. فيشي بي وايت للهالات السوداء و لوي ويدمر لمقاومة شيخوخة الجلد .  ما اتذكر اسعارهم كويس لكن اظن ان لويس ويدمر كان بـ 240 ريال و فيشي بـ 170 ريال .

بدأت استخدامهم في شهر شوال .. و استمريت لحتى اليوم الصبح .. يعني تقريبا 5 أشهر . كنت استعمل لوي ويدمر في الليل و فيشي في الصباح .

النتيجه بعد كل هالمدة تحسن بسيط جدا :(   الهالات خفت لكن الخطوط الرفيعة ما زالت موجودة وما احس المنطقة تترطب . لا وكمان في الفترة الاخيرة صرت احس ان كريم فيشي جفف جفوني ! بصراحة الكريمين مو على قد الصجه والمدح . يعني عالفلوس والوقت اللي انتظمت فيه كنت اتوقع نتيجه افضل . لو اني هالفترة منتظمة على زيت جنين القمح أو زيت فيتامين اي كان شفت نفس النتيجه أو احسن بسعر ارخص !

النقطة الايجابية الوحيدة فيهم انهم ما يخلصوا بسرعة و العلبة تكفي لفترة طويلة . يعني بعد كل هالفترة لسه ما خلصوا من عندي . يمكن في نقطة ايجابية ثانية في لوي ويدمر هو انه ممكن يستخدم للرقبة كمان .

بصراحة ما انصح بشراءهم ولا افكر اشتريهم مرة ثانية . ناوية استخدم زيت فيتامين اي والخيار و اشرب مويه كثير و صلى الله وبارك :)

Breathe in. Breathe Out

مرحبتين :)

رجعت بموضوع جديد .. الحمدلله لسه متحمسة احقق اهداف وتحديات السنة الجديدة  ♥


من أهدافي لسنة 2013 اني احاول اخفف من التوتر في حياتي على قد ما اقدر  . خاصة اني انسانه تتوتر بسرعة واحيانا من اشياء ما تسوى :(     .. والحمدلله لقيت طريقة فعّالة وسريعة

والأحلى انها حاجة نسويها كل ثانية في حياتنا ... لكن ما نسويها بشكل صحيح عشان كذا ما نحس بتأثيرها وهي التنفس



التنفس بطريقة صح يزيل التوتر و يعطي الجسم طاقة أكبر ، كمان يخفف من تأثير نوبات الهلع و يحسّن المزاج و يعالج الأرق .

لو لاحظتوا كيف الطفل اللي لسه مولود يتنفس راح تلاحظوا ان بطنه مو صدره يرتفع وينخفض مع كل نفس .. وهذه هي الطريقة الصح للتنفس .. تحرك البطن معناه ان الانسان يستخدم 100% من الرئتين في التنفس .. في حين انه في الحالات العادية يستخدم بس 30 % .. عشان كذا يسموا التنفس الصحيح " التنفس البطني" أو Abdominal Breathing



و زي ما شفتوا كلنا واحنا لسه مولودين نتنفس صح .. ومع الوقت ولما نكبر لسبب مجهول ما نستمر على التنفس البطني .. لكن ممكن بالتدريب نحسن من طريقة تنفسنا .. طريقته سهلة وبسيطة و حتشوفوا في ساعتها كيف حيفيدكم .

الطريقة :

- تمددي على الأرض أو اجلسي .
- حطي يد على بطنك ويد على صدرك
- خذي نفس عميق عن طريق الأنف ، وحاولي انه مع النفس بطنك تتوسع  ( بدون ما تتعبي نفسك)
- لازم يدك اللي على بطنك ترتفع اعلى من اللي على صدرك
- اكتمي نفسك عدة ثواني .. بعدين خرجيه عن طريق الفم بهدوووء
- حاولي يكون وقت الزفير اطول من وقت الشهيق
- كرريها عدة مرات . حاولي ما تجهدي نفسك .. واذا حسيتي بدوخة معناها انك كررتيها أكثر من اللازم و الأفضل توقفي .

و بس !   طريقة سهلة جدا و جربتها وماصدقت كيف خففت من التوتر .. صرت في اي موقف اكون متوترة اسويها كم مرة والحمدلله احس باسترخاء و بهدوء  .


اتمنالكم ايام مريحة خالية من التوتر ♥♥

التأمل ( Meditation ) ..

بوستين في يوم واحد  !! ... هذا اللي يسموه حماس المبتدئين هههههههههه

أهم هدف حطيته لنفسي في 2013 هو اني امارس التأمل كل يوم لمرة واحدة على الأقل .



من زمان وأنا نفسي جدا اتعلم التأمل لكن كنت اشوفه شي صعب و معقد وماكنت متأكده من فوايده . لحد ما شفت الاسبوع الماضي حلقة من برنامج دكتور أوز و كان ضيف الحلقة مغني مشهور يعاني من الاكتئاب الحاد من صغره :( .. قال جمله لفتت انتباهي .. قال ان اللحظات الوحيدة اللي ما يحس فيها بإكتئاب هي اللحظات اللي يمارس فيها التأمل ..

بعد الحلقة تشجعت ابحث عن التأمل وقرأت كتاب عنه و قرأت كمان كثير في المواقع عن طريقته  وفوايده . تفاجأت لما اكتشفت ان طريقته سهلة جدا و مافيها أي تعقيد . و تفاجأت كمان من فوايده الكثيرة وان حتى الأطباء ينصحوا فيه ..

طيب تعالوا نسأل .. ايش هو التأمل ؟

لوعملتوا بحث عن التأمل في الانترنت راح تلقوا تعاريف كثيرة من النوع التي ما تدري وش تبي ! النوع اللي يقولك ان التأمل هو انبثاق حيز اللاوعي للطاقة الكامنة في الانسان ! .. بالله هذا كلام ؟؟

عشان كذا خذوا العلم مني :)  .. التأمل هو ببساطة انك تركزي تفكيرك على نقطة وحدة و تحاولي تفرغي ذهنك من كل الافكار الثانية .

طيب ايش فوائده ؟ فوايد التأمل انه  يساعد في خفض ضغط الدم وتهدئة نبضات القلب السريعة وتحسين الدورة الدموية و يخفف من الشعور بالألم .

أما الفوايد النفسية فهي الاسترخاء ، زيادة التركيز ، صفاء الذهن ، التقليل من القلق والتوتر ، التوازن النفسي ، زيادة الشعور بالرضا ، تحسن المزاج ، و البعض يقول ان التأمل يطور من الحدس يعني يخلي الحاسة السادسة شغالة على طول :)


بالنسبة لطريقته أنا بس راح اتكلم عن طريقة التأمل للمبتدئين ... و على فكرة التأمل له أكثر من طريقة وأهم شي الواحد يختار الطريقة اللي يكون مرتاح لها لأنه لو توتر أثناء التأمل ما راح يستفيد شي ..

الطريقة كالتالي :
1- اختيار مكان هادي بعيد عن الازعاج ( مثلا غرفة في البيت بعيدة عن الضوضاء )
2- الجلوس بظهر مستقيم - وهي الجلسة اللي يسموها وضعية اللوتس .. لكن مو شرط .. ممكن تتمددي على الارض او الكنبة .. أهم شي لو تبغي  تجلسي يكون الظهر مستقيم .
3- الاسترخاء .. حاولي انه ما يزعجك شي او يوجعك شي .. لو الجلسة ازعجتك اسندي ظهرك على مخدات أو تمددي .. لو لسه متعشية انتظري ساعتين بعد الأكل .. البسي ملابس مريحة ... حطي اضاءة خافته أو ولعي شمعه أو موسيقى خافته .
4- غمضي عينك و حاولي ان عضلات وجهك تكون مسترخية .. ولا تكشري :) 
5- وهنا نجي لأهم أهم نقطة .. محاولة التركيز على شي واحد . كبداية من الأفضل يكون التركيز على التنفس .. يعني وانتي مغمضة عينك ركزي على تنفسك .. تنفسي طبيعي من انفك . وحاولي تتخيلي الهوا وهو يتحرك في جسمك .. فضي مخك من اي افكار ثانية .. طبعا هذه الخطوة صعبة جدا لأن الواحد في راسه الف فكرة و فكرة في نفس الوقت .. و في البداية بالذات راح يكون شبه مستحيل .. لكن مو مشكلة .. لو سرحتي في اشياء ثانية حاولي بهدوء و بلطف ترجعي تركيزك على التنفس .. لا تكوني قاسية على نفسك و لا تتوتري .
6- لما تخلصي افتحي عينك بهدوء وخذي نفس عميق و اوقفي بهدوووء .. 


و بس ! هذا هو التأمل :)  .. شفتوا ما اسهله !


نصائح مهمة :
- كبداية جربي تمارسي التأمل مرتين في اليوم كل مرة لمدة خمس دقايق .. اذا صار التركيز اسهل عليكي زوديها لربع ساعة و هكذا حتى توصلي ساعة كاملة
- أفضل وقت للتأمل يكون الصباح وبالذات الفجر لأنه يكون اهدى وقت .
- لا تمارسي التأمل عشان فوايده بس و يخيب أملك لو ماشفتي نتيجه .. ادري انها صعبة شوي يمكن تقولوا اجل نتأمل عالفاضي :) .. الخبراء يقولو لكم خلي التأمل هو هدف بحد ذاته .. هذا الكلام له علاقة بفلسفة الـ Zen و الفلسفات القديمة الاخرى
- البعض ينصح بترديد عبارة معينة تكون هي نقطة التركيز (بدل التنفس ) .. ممكن تكون عبارة ايجابية ( أنا أفضل .. أنا اقوى ) و ممكن تكون عبارة دينية  (سبحان الله .. لا إله إلا الله ) .. فايدة نقطة التركيز انه كل ما سرحتي بأفكارك ترجعي للتركيز على هذه النقطة وتصفي ذهنك من الافكار الثانية .
- اقرأي و ابحثي في الانترنت عن التأمل يمكن تكتشفي طرق ثانية تناسبك أكثر . التأمل موضوع طويل ومتشعب وفيه ناس بتمارسه طول حياتها .. حتلقي في المواقع الاجنبية كلام كثير عن البوذية فلا تخافي :)  ..اتركي كل الكلام هذا لأن التأمل مو حكر على ديانة معينة أو جماعة معينة .

 اليوم الصباح لأول مرة جربت التأمل لمدة 5 دقايق . انبسطت لأني قدرت اركز على تنفسي لمدة ثانية كامله :) .. والخمس دقايق عدت بسرعة شديدة ... راح احاول اجربه كمان اليوم المسا قبل النوم .. لحد الآن اشوفه اسهل بكثير مما توقعت والتركيز على التنفس مو صعب كثير .

ذاتس أوول ... اتمنى يكون الموضوع مفيد و اتمنى لكم تأمل يجيبلكم السعادة والرضا .